बिल्डर तुमच्या हक्काच्या FSI वर डल्ला मारत आहेत

पुणे महानगर पालिका क्षेत्रात लोहगाव, उत्तमनगर (शिवणे), शिवणे, मुंढवा (उर्वरित केशवनगर) , हडपसर (साडेसतरानळी), शिवणे, आंबेगाव (खुर्द), आंबेगाव (बुद्रुक), उंड्री, धायरी, बावधन हि ११ गावे समाविष्ट झाली. या भागात पूर्वीच मोठ्या प्रमाणवर बांधकाम प्रकल्प उभे राहिले आहेत. त्या बांधकाम प्रकल्पात सदनिका घेणाऱ्या सर्वांनी सावध होण्याची गरज आहे. जागता पहारा ठेवण्याची गरज आहे. त्यांच्या वाढीव FSI वर बिल्डर डल्ला मारत आहेत.

ग्रामपंचायत असताना त्या भागातील चटईक्षेत्र (FSI) (उदा. १ : ०.७५ ) कमी होता. महानगर पालिकेत समाविष्ट झाल्याने FSI (उदा. १:१ म्हणजे ०.२५ इतका ) वाढला आहे. (म्हणजेच एक हजार स्क्वेअर मीटर जमिनीवर ७५० स्क्वेअर मीटर बांधकाम केले जाऊ शकत होते. आता पुणे महानगर पालिकेत गावांचा समावेश झाल्याने मनपाच्या परवानगीने रीतसर २५०० स्क्वेअर मीटर बांधकाम करता येऊ शकणार आहे.) या वाढलेल्या FSI वर बिल्डरांचा डोळा असून अनेक बिल्डर बांधकाम आराखडा सुधारणा करण्यासाठी पुणे महानगर पालिकेकडे अर्ज करत आहेत आणि अनेक अर्ज करण्याच्या तयारीत आहेत.

मोफा कायद्यातील तरतुदीनुसार बिल्डरला जर बांधकाम आराखड्यात बदल करायचा असेल, सुधारणा अथवा वाढ करायची असेल तर सदनिकाधारकांची पूर्व परवानगी घेणे बंधनकारक आहे. अनेक बिल्डरांनी खरेदीखत करताना त्यात अनेक अटी व शर्ती टाकलेल्या असतात, त्यात बांधकाम सुधारणेचे कलम सुद्धा टाकलेले असते. त्याआधारे बिल्डर तुमची फसवणूक करू शकतो.खरेदीखतात भविष्यातील FSI बाबत कलम टाकणे, हे बेकायदेशीरअसल्याचे निवाडे उच्च न्यायालयाने दिलेले आहेत.वाढीव FSI वर तेथील सदनिकाधारकांचा अधिकार आहे.